Maraming maling practice sa pagda-diet. Kadalasan, sa kagustuhang pumayat ng isang tao, halos hindi na siya kumakain para lamang ma-achieve ang kaniyang target weight and size. Ngunit hindi lahat ng klase ng diet ay angkop sa lahat ng tao. Ang natatanging paraan para makasigurong tama ang diet na ginagawa ay sa pamamagitan ng pagkonsumo ng mga masustansiyang pagkain.
Napakarami nang diet program na inirerekomenda ngayon. Subalit hindi naman lahat ay nagiging mabisa at ligtas sa katawan. Kaya naman mas mabuti kung ang ikokonsumo sa pagpapapayat ay mga pagkaing kilala natin. Ito yung mga pagkaing madalas makita sa ating kusina at refrigerator. Importante ang masustansiyang pagkain sa pagpapapayat dahil ang mga ito ay nakatutulong sa pagpigil ng pamumuo ng mga taba sa katawan.
Nakatutulong ang masustansiyang pagkain para pumayat
Noong maliit na bata ka pa, sinabihan ka ba ng magulang mo na kumain ka ng masustansiyang pagkain para tumaba? Kalimitang advice ito ng mga nanay at tatay sa mga batang mahirap pakainin. Pero sa artikulong ito, madidiskubre mong makatutulong din mga ganitong uri ng pagkain sa iyong pagpapapayat. Totoong napaka-importante ng pagkain ng tama sa kalusugan ng isang tao. Ito ay nakapagpapalakas ng katawan. Ang isang indibidwal na may malusog at malakas na pangangatawan ay mas may labang harapin ang mga pagsubok ng pagpapapayat.
Sa masustansiyang pagkain kumukuha ng lakas ng pangangatawan ang isang tao. Dahil sa pagkain nito, napapanatili ang tamang timbang at kalusugan. Kapag hindi kumain ng tama, ito ay maaaring maging sanhi ng panghihina ng kanilang immune system. Kailangang lumakas ang immune system ng tao para gawin ng tama ang mga paraan ng pagpapapayat. At para mangyari ito, kailangan niyag kumain ng masustansiyang pagkain.
Mga dapat kainin para sa tamang pagpapapayat
Para malaman kung tama ang mga kinakain, importanteng alam mo ang value ng kahit anong ipinapasok mo sa iyong katawan. Tiyaking kinokonsumo ang tamang bitamina at mineral ng katawan. Higit sa lahat, kumain ng masustansiyang pagkain gaya ng gulay at prutas na rich in fiber. Ang mga prutas na sitrus ay da best maging companion sa pagpapapayat.
Ilan sa mga ito ay suha, mansanas, orange, pasas, at hinog na saging. Ang saging ay mainam sa pag-eehersisyo dahil sa taglay nitong potassium. Nakakatulong din ang saging na mag-relax ang isang tao. Narito ang ilan pa sa mga dapat kainin para sa tamang pagpapapayat:
- Maaasim na prutas gaya ng dalandan, kalamansi at suha. Ang mga ito ay rich in Vitaminc C na No. 1 na panlaban sa ubo, hika at sipon, maging ng arthritis. Mas makakapag-exercise at magpapayat ang isang taong may malusog na pangangatawan.
- Strawberries – ayon sa mga eksperto, ito ay epektibong panlaban sa kanser. Mas magiging makabuluhan ang pagpapapayat kung alam mong ikaw ay malusog.
- Papaya – Mainam sa pagpapatunaw ng pagkain ang papaya. Dahil dito, mabilis na matutunaw ang ano mang kainin kaya naman mabilis ding papayat.
- Melon at pakwan – ang mga ito ay masustansiyang pagkain dahil sa kakayahan nilang labanan ang sakit sa pantog at bato. Maliban dito, mayaman din sa potassium at Vitamin C.
- Pinya – ito ay kilala sa kakayahang makapagpalakas ng resistensiya. Ang taong may malakas na resistensiya ay may mas malaking tsansang pumayat. Siya ay magiging mas masigla sa pag-eehersisyo. Magiging mas determinado rin siya sa kaniyang adhikain sa pagpapapayat.
